ايه يعنى دم الشهداء اللى مصدعينا بيه ؟!
ايه يعنى دم الشهداء اللى مصدعينا بيه ؟!
يعنى هو مخلوط بمية دهب ؟ عملوا ايه الشهداء ؟ ضحوا بحياتهم علشان البلد ؟ افتدونا بأرواحهم وقت الضرب ؟ طلعوا يهتفوا ( تغيير حرية عدالة اجتماعية ) فى عز ما كان فيه جبروت و خوف من أمن الدولة ؟ طلعوا و قالوا ( ارحل ) من غير ما يطلبوا وظيفة أو أجور أو طعام ؟ عملوا ايه الشهداء غير إنهم كانوا بيهتفوا ( سلمية سلمية ) و رصاص القناصة بيحصد رؤوسهم و صدورهم حصد ؟ عملوا ايه غير إنهم اعتصموا فى الميدان فى عز الشتا و بعد فض الإعتصام كنسوه و نظفوه و دهنوه ؟ عملوا ايه غير إنهم استحملوا الإهانة سواء و هم أحياء أو و هم أموات ؟ ايه يعنى أما يموتوا علشان البلد و يتهد النصب التذكارى اللى اتعمل ليهم فى الميدان ؟ ايه يعنى أما يموتوا برصاص قناصة و بعد كده منشوفش صورة قناص واحد مكتوب تحتها ( تمت إدانته ) ؟
عملوا ايه الشهداء ؟ ماكانوش عايزين يبقوا وزراء و بقوا شهداء ؟ مكانوش عايزين يهجوا و يسيبوا البلد زى آلاف غيرهم ؟ مكانوش عايزين يحرقوا أنفسهم يأساً زى غيرهم ؟واجهوا الموت بصدور عارية و ابتسامة متشوقة للجنة أو الملكوت ؟ الولاد اللى فيهم متحرشوش ببنت و البنات اللى فيهم أثبتوا إنهم مش تافهات أو ناقصات عقل ؟ عملوا ايه يعنى زيادة ؟ كانوا لغاية آخر لحظة بيقولوا ( الشعب و الشرطة إيد واحدة ) ؟ كانوا لغاية آخر لحظة مش جواسيس و مش عملاء و مخدوش لا وجبة كنتاكى و لا حتى كان بيبسى ؟
كانوا لغاية آخر لحظة مصر هى رقم واحد عندهم حتى لو طلعوا من بيوتهم من ورا أهاليهم ؟
زى ما انتوا شايفين كل اللى عملوه ولا حاجة غير إنهم بيحبوا يبقوا شهداء .. براحتهم هما أحرار ملهومش فى عيشة قذرة كانوا هيبقوا فيها عبيد فقراء يزدادون فقرا مكممى الأفواه ..
هما أحرار .. هما من التحرير
الشهيد اللى فوق ده طلع زيى و زيك يوم 28 يناير ، شكله عادى .. شاب شبهى و شبهك .. الفرق الوحيد بينى و بينه إنى عشت لكن هو جاتله رصاصات مطاطية فى العنق موتته ، الفرق الوحيد اللى بينه و بينك إنك رجعت بيتك مصاب أو حتى صاغ سليم المهم انتقلت لمنزلك لكن هو نقلوه لمستشفى فى محاولة لإسعافه و بعدها نقلوه لثلاجة المستشفى و هو بينطق الشهادتين لأنه حافظ القرآن كله و عارف يعنى إيه أهمية النطق بالشهادتين بدون تلقين .. الفرق بينى و بينه إنى عندى 28 سنة و مش بعلم حد أى حاجة إلا فى كتاباتى المتواضعة و نصايحى البسيطة و هو عنده 24 سنة يوم ما مات و كان بيعلم الأطفال القرآن فى مسجد ( الحصرى ) بـ ( العجوزة ) و كان بيصلى إمام بالمصلين فى رمضان ..
ايه يعنى دم الشهداء .. هو ده معنى دم الشهداء
فيديو من معركة كوبرى قصر النيل تظهر لقطة ساعة مقتل الشهيد مصطفى الصاوى
رحمه الله
***
فى نسخة المقال على (الفيس بوك) http://www.facebook.com/essam.mansour/notes#!/note.php?note_id=10150692554425615
شرفنى الأديب العملاق (ابراهيم عبد المجيد) برأيه قائلا بالحرف:
- كتابتك رائعة وعميقة تسعدني جدا ياعصام . دمت للوطن.
فقلت له فى محادثتنا الإليكترونية السريعة:
- هذا شرف لا أستحقه منك يا أستاذنا .. دمت حضرتك وسام على الأدب المصرى و على خواطر ثقافتنا.
- هذا شرف لا أستحقه منك يا أستاذنا .. دمت حضرتك وسام على الأدب المصرى و على خواطر ثقافتنا.
فقال بتواضع يندر أن نجده فى الروائيين الكبار أمثاله، بكلمات لن أنساها:
- والله انا تتحرك مشاعري كثيرا الي جانب عقلي حين تكتب.
هكذا أجبته بخجل حقيقى:
- و الله العظيم حضرتك بتكسفنى أكثر و أكثر و فى نفس الوقت تعطينى حافز رهيب لا يمكن لأحد تخيله كى أقدم المزيد و الله المستعان يا أستاذنا ، و بالمناسبة حوارك فى الفيلم التسجيلى عن الراحل ( أحمد عبد الله ) كان دقيقا و متوازنا كالعادة و أمتعنى كثيرا رؤية حضرتك على قناة التحرير .. قناة الثوار.
فقال الكاتب الكبير:
- استمر ياعصام .نحن في حاجة الي القلم الصادق.
- أشكرك أ . ابراهيم و أقدر كلماتك.
حقا الكبار من هم على شاكلتك ممن يقفون الى جانب المجهولين والقادمين الجدد من كوكب الهواة .. فشكرا استاذنا (ابراهيم عبد المجيد) وتحياتى الحارة والكبيرة الى حضرتك
تعليقات