شرح فيلم TENET
شرح (بالعامية) لفيلم TENET
طيب، هو عشان أنا شفت ناس كتيرة مش فاهمة الفيلم، أو دخلته مرتين وهتبدأ لسه تنتبه للتفاصيل في المرة التالتة، أو كتبت جملة (مراجعة فيلم TENET) ثم اكتفت بالقصة الظاهرية وسابت اللُب العلمي على فيسبوك ويوتيوب، فالبوست ده مخصص لشرح الجوهر العلمي ده تحديدًا، يعني مفيهوش حرق للأحداث.
وطبعا هعفيكم من المقدمات الطويلة الخاصة بشرح قصة حياة (نولان) ومواضيعه السينمائية وأفلامه، لأن ويكيبيديا بتقوم بالدور ده بكفاءة عليا.
نخش في الموضوع مباشرة: ايه هي نواة الفيلم العلمية؟
النواة هي التلاعب بالـ Entropy اللي بيترجم بالقصور الذاتي وأحيانًا التحول، أو عكس القانون الثاني في الديناميكا الحرارية. يعني (نولان) قبل ما يصور فيلمه، كان فاهم المصطلح ده، وعلى أساسه كتب السيناريو.
طيب ايه الانتروبي ده يا شباب؟
ببساطة كبيرة وبشكل مختصر للغاية، انت لو جبت كوباية ووقعتها من على الترابيزة واتكسرت تلاتين حتة، فهي كده انتروبيتها زادت، مستحيل فيزيائيا ترجع تتكون تاني لوحدها، يعني (عملية غير معكوسة) زي ما سماها العالم الألماني (رودولف كلاوزيوس)، أو لو جبت بالونة هيليوم من بتوع تغيير الصوت دول وفرقعتها في أوضة معزولة، فالهيليوم هينطلق بشكل فوضوي، ويختلط بالهواء بطريقة متجانسة (إنتروبي متزايد)، ومستحيل يرجع للبالونة لوحده وبشكل طبيعي، إلا لو استخدمت طاقة خارجية عشان تصهر الكوباية وتعيد تشكيلها، أو تفصل الهيليوم وتعيد تعبئته.
وهكذا كل شيء في الكون، بيتفاعل وينقل طاقته وينهار، كل شيء بيتحلل.. يعني كله رايح على رأي عم ضياء 
(نولان) عكس الإنتروبي بقى على الأشخاص والأشياء اللي استخدمت بوابة معينة في الأحداث، بوابة ليها جزأين مفصولين بجدار زجاجي، قادرة على عكس زمن مستخدمها!
#مثال من الفيلم: الشخص اللي هيدخل من البوابة دي، هيشوف نفسه - في نفس اللحظة، وعبر الجدار الزجاجي - بيعمل اللي مكتوب بين قوسين في السطر التالي:
((نسخته التانية بتدخل من الناحية التانية))!
هتقولي: قصدك بتخرج من الناحية التانية؟ هقولك بتدخل، لأنه شاف المكتوب بين قوسين فوق ده بيحصل بالعكس! inverse!
يعني عشان يدخل من البوابة، لازم يستنى لغاية ما يشوف نفسه المعكوسة الناحية التانية راجعالها بضهرها، لأن ده دليل إنه نجح في الانتقال، ولازم يدخل في نفس الوقت.
يعني الزمن بيمر بيك انت للأمام، لكن لو انتقلت للناحية التانية من الجدار الزجاجي، هتحتفظ بزمنك وآلية تحركك، في حين إن كل حاجة حوالك هتكون بزمن معكوس منقلب inversion بالنسبالك، الوقت بيرجع بيها لورا (إنتروبي متناقص).. الطيور بتطير لورا، والعربيات بترجع لورا بسرعتها العادية اللي ماشية بيها ع الرابع أو الخامس حتى. إنفجار اللغم بتتلم شظاياه من كل حتة، وينضغط الدخان والنار بتوعه، ويرجع اللغم سليم تحت الأرض، شعر دقنك بيقصر مش بيطول، باختصار الكوباية بتتجمع أجزاءها المكسورة، وترجع تاني سليمة فوق الترابيزة!
ودي طريقة ثورية في تناول السفر عبر الزمن، انت هنا الوقت بيمر عليك بالعكس، لدرجة إنك ممكن تقابل نفسك في نقطة معينة في المكان والزمان وتتخانق معاها كمان!
الواقع - وبعيدًا شوية عن الاختصار لو الكلام شدك - إن مفهوم الـ Entropy يبلغ من أهميته إنه الدليل الوحيد على إن الزمن بيمر لقدام، عشان كده استخدامه كان منطقي جدا بالنسبة لـ (نولان)، المهتم في موضوعاته بتناول الزمن ومناقشته من وجهات نظر مختلفة ومثيرة، هنفترض إنك جبت بيضة وكسرتها وسخنتها عشان تعمل أجدع طبق بيض عيون من اللي أنا شخصيا بحبه، فالعملية دي سواء ماشية من الأول للآخر أو معكوسة صحيحة فيزيائيا، ومفيش حاجة تدلنا فيها إذا كان الزمن ماشي في أي اتجاه، زي كلمة (tenet) نفسها تقدر تقرأها من اليمين للشمال ومن الشمال لليمين بدون ما الحروف نفسها يحصلها حاجة، لكن لو طبقنا ملاحظات الإنتروبي، هنلاقي إن في الزمن الطبيعي فيه عناصر عشوائية ظهرت، لكن في الزمن المعكوس - المستحيل فيزيائيا في - العشوائية بتقل في النظام غير المعزول.
عشان كده العلماء صكوا مصطلح (سهم الزمن) time's arrow، للتعبير عن الوقت اللي باتجاه واحد فقط، للأمام. وطبعا السببية مرتبطة بشكل وثيق بسهم الزمن، عشان كده البطل في الفيلم قال سؤال مهم جدا عن السببية والإرادة الحرة. في مشهد المسدس في التريلر بيصوبه على الجدار، فالرصاصة المعكوسة بترجع من الجدار وتخش المسدس وترجع سليمة في الخزنة. يعني مفيش تفسير هنا لمصطلح السبب والنتيجة، لأنه إمتى قرر يضرب الرصاصة، في حين إنه كل اللي عمله إنه لقطها؟ يعني زمن الرصاصة بس هو اللي كان معكوس، في حين إن زمنه هو كان طبيعي، فإزاي جه القرار؟ الإجابة بمجرد النية إنه هيقرر مستقبلا يطلق الرصاصة، ومن ثم هي دلوقتي اتضربت بعد ثواني في مستقبله، وبتسافر زمنيا للماضي فترجع لماسورة المسدس.
بمجرد النية إنه هيرمي الجسم المعكوس من إيده بعد ثانيتين، هيلاقي الجسم الموجود فوق الترابيزة بينط يخش جوه إيده!
طبعا تساؤله جاي من إدراك سهم الزمن النفسي الخاص بكل انسان. إنت بتكبر في السن فبتشعر بحاجتين أو بتطلع بنتيجتين، الذاكرة، لأن الماضي بالنسبالك معلوم، والإرادة، لأن المستقبل بالنسبالك مجهول لكن تقدر تخطط للتأثير فيه.
الإنتروبي برضه مرتبط بنظرية الانفجار الكبير اللي أدى لنشوءء الكون، لأن لو الطاقة دي حصلها عدم تجانس وانتهت، هيحصل موت حراري Big Chill، ومن ثم يحصل تناقص إنتروبي يؤدي لإنسحاق الكون كله في نقطة واحدة زي ما انفجر من نقطة واحدة.. يعني ينعكس فيما يسمى الانسحاق العظيم Big Crunch
كور البلياردو اللي اتضربت واتفرقت في كل اتجاه هتتجمع تاني وتعمل مثلث منتظم. السفينة بتاعة مناظرة المؤمن والملحد اللي اتحطمت على الشاطئ هتجمع نفسها تاني وينتصر الملحد!
الفرق بين tenet وباقي أفلام السفر عبر الزمن، إنك في الأفلام دي بتدوس زرار آلة الزمن، وبشكل سحري تلاقي نفسك في زمن الفراعنة، أو في المستقبل البعيد سنة 4000 ميلادية، هنا (نولان) قالك لا يا مولانا الموضوع مش بالبساطة دي، لو هترجع يوم هتعيشه كله، لو سنة هتعيشها كلها، لو لسنة 1945 عشان تقتل هتلر اتجدعن وكل خضروات كتير عشان هتضطر هتعيش 75 سنة في عالم معكوس لغاية ما ترجع لليوم المطلوب، لو عايز توصل لسعد زغلول خد حبيبتك معاك بقى، عشان تخلفوا وتجهز أبناءك وأحفادك للموضوع ده. طريقة نادرة جدا إن لم تكن أصلية تماما للسفر عبر الزمن.
طب إيه اللي خلا (نولان) والغرب عموما يتوصلوا للحاجات الوهمية دي ويستوعبوها؟ الإجابة يا صديقي هي احترام قيمة العلم، والخيال في نفس الوقت، يعني الخيال العلمي اللي بالنسبالنا بنستخدمه في فيلم (الغسالة)، هما بيستخدموه في فيلم (عقيدة)، وبيستخدمه (إيلون ماسك) في تطبيقات على أرض الواقع لتطوير الحياة والبشر. الإجابة إننا حتى لو درسنا كل اللي فات ده مش هيناقشه غير المتخصصين فقط، وممكن كمان تلاقي في المتخصصين نفسهم اللي لسه معتقد إن سهم الزمن مستحيل علميا ينعكس، برغم تجربة 2019 الشهيرة اللي قام بيها مجموعة من العلماء الروس، وعكسوا فيها سهم الزمن فعليا على كمبيوتر كمومي IBM quantum computer، يعني نفذوا تجربة (عفريت ماكسويل) Maxwell's demon الفكرية على أرض الواقع، والتجربة بتتخيل حدوث الإنتروبي المتباطئ أو المعكوس وتقدر تقرأ عنها في صديقتنا ويكيبيديا.
الإعجاز أكتر من كل اللي فات ده عند (نولان)، مش إنك تتخيل المنظور السينمائي، بعد ابتكارك للفكرة، بل تنفيذك ليها وإنت أساسا من أكتر المخرجين رفضا لاستخدام الكمبيوتر، لدرجة إنك تشتري طيارة عملاقة عشان تفجرها، بدل ما تعمل ده بالـ CGI.
تعليقات